كل أخبار ووصفات الطبخ المغربية والعالمية مباشرة و في الحين في موقع أصوات. اسمعوا أصوات مباشرة عبر الانترنت.
الأحد 4 ديسمبر 2016

حديث ومغزل مع سناء الزعيم

حديث ومغزل مع سناء الزعيم - شهيوات السفرجل

Imprimer
شهيوات السفرجل

اليوم في حديث ومغزل مع سناء الزعيم قدمو لينا المستمعات اللي سمعنا صوتهم لأول مرة في حديث و مغزل مع سناء الزعيم  مجموعة من الشهيوات للسفرجل وهذه البعض منها :

* خديجة من الدار البيضاء : مربى السفرجل // 1 كيلو سفرجل مغسول و مقطع طريفات و نضيفو كأس ديال الماء و حامضة معصرة و نخليو الكل يطيب لينا بالمهل و في الأخير نزيدو السنيدة و نخليو المربى حتى يتخثر و نطفيو عليه من البوطة ثم نطحنوه ونخليوه يبرد و نوضعوه في قنينات زجاجية معقمة و نضعه في المبرد .

* فريدة من الناظور : طريقة لترقاد السفرجل و يبقى مدة 6 أشهر حتى لسنة واحدة // سفرجل مقسوم على زوج مفلح من الوجه على شكل علامة (+) ثم نستفوه في اناء زجاجي و نضيفو زلافة ديال سنيدة و نعوموه بالماء و ناخذو كدرة أو طنجرة فيها الماء ونوضعوها على نار هادئة ( حمام مريم ) ونضيفو ليها الطنجرة ديال طريفات السفرجل و نخليوهم يطيبو مدة 45 دقيقة من بعد كنغطيو مزيان بالسلوفان و بغطاء وفاش كيبرد كنوضعوه جانبا في مكان بارد دون الثلاجة و جاف وممكن الحفاظ عليه مابين 6 الى 12 شهرا .

* حسناء من بركان : حلوى ديال السفرجل // 1 كيلو سفرجل مقطع مربعات ، القشور و اللب نوضعوهم في ثوب نقي و نسلقوهم مع السفرجل ثم نمعكوه بالشوكة و نوضعوه في مقلا مع نصف كيلو ديال سنيدة و نعسلوه مزيان ثم نسرحوه في صينية و ندخلوه للمبرد لمدة ساعتين ، و نقطعوه بالمرشم على أشكال مختلفة ثم نفندوها في اللوز و الكاكاو و الكوكو مهرمشين و نقدموهم بالصحة و الراحة .

*الهام من الجديدة : طاجين السفرجل معسل // ممكن نخضرو هاد الطاجين باللحم أو الدجاج أو الأرنب ( قنية ) .

- العطرية : ابزار ، سكينجبير ، خرقوم ، ثومة ، بصل ، زعفران و الملح ، نشحرو الكل سواء مع اللحم أو الدجاج أو الأرنب و نخليو الكل يطيب بالمهل .

- السفرجل ، نسلقوه مع الماء و القرفة و السنيدة ثم ندعكوه حتى يولي مطحون مزيان و نضيفو ليه الزبيب اللي كان مرقد في ماء الزهر و مقطع صغير و ندعكو الخليط مزيان و نضيفو القرنفل و الكوزة و الزنجلان محمر و مطحون ثم نخلطو مع السفرجل اللي معكناه و نديرو كويرات و نفندوه في الزنجلان و نزينو به الطبق الرئيسي و نقدموه بالصحة و الراحة و هذه  فكرة مختلفة في تقديم السفرجل معسل في الطاجين المغربي .

* نعيمة من سلا : طاجين السفرجل // كيلو و نصف من لحم الغنمي ، بصلة مشلظة ، ملح ، قزبر حبوب ، شوية السمن الحار ، الابزار ، ثومة ، سكيينجبير ، خرقوم  وأعواد القرفة في الأخير .

 - السفرجل نسلقوه حتى يقرب يطيب و نقطروه مزيان.
 نحكو مطيشة و نضيفو الثومة ومنين كيتشحرو مزيان كنضيفو معلقة ديال السنيدة و نخليوها تعسل ، نحيدو اللب للسفرجل و كنعمروه بمطيشة معسلة ونزينو به الطبق فوق اللحم و نقدموه بالصحة و الراحة .

* فاطمة من تاونات : طاجين بالسفرجل مقلي // نصبو الطاجين ديال اللحم بالسمن و زيت العود و العطرية .

نسلقو السفرجل في الماء و طرف ديال الحامض ونخليوه يقطر مزيان قبل القلي و نفندوه في سنيدة و القرفة وفنيلا ، ثم في مقلا فيها زيت سخون نقليو السفرجل ثم نقدموه في الطاجين ديال اللحم و نوضعو كركاعة فوق كل سفرجلة و نقدموه بالصحة و الراحة . 

شكرا مستمعاتنا لاختياركم أصوات الاذاعة اللي كترافقكم في حياتكم اليومية ، وبرنامجكم حديث و مغزل مع سناء الزعيم برنامج كل امرأة مغربية من الاثنين الى الخميس ابتداء من 10 صباحا .

 

خدمات اصوات
» حالة الطقس
الأحوال الجوية: المغرب
حفظ المدينة
» أوقات الصلاة
عرض أوقات الصلاة: