كل أخبار ووصفات الطبخ المغربية والعالمية مباشرة و في الحين في موقع أصوات. اسمعوا أصوات مباشرة عبر الانترنت.
السبت 3 ديسمبر 2016

حديث و مغزل مع سناء الزعيم

حديث و مغزل مع سناء الزعيم - أفكار لصنع الكاتشوب و مطيشة الحك بالمنزل

Imprimer
أفكار لصنع الكاتشوب و مطيشة الحك بالمنزل

اليوم في حديث ومغزل مع سناء الزعيم قدمو المستمعات اللي سمعنا صوتهم لأول مرة على أصوات و في حديث و مغزل مع سناء الزعيم مجموعة من الأفكار لتحضير الكاتشوب و مطيشة معلبة بالمنزل و هذه هي الوصفات اللي قدمو لينا مشكورات :

* فاطمة من القنيطرة : الكاتشوب // 165 غرام أي نصف كأس ماء ديال العنبة من مطيشة الحك ، معلقة صغيرة من البصلة يابسة  ، و نصف كأس ماء ، كنرقدوهم مدة ساعتين .

كنضيفو 2معالق كبار سنيدة ، ربع معلقة صغيرة ديال الموطارد ، معلقة صغيرة ديال الثومة ميبسة ، راس معلقة قرفة ، ملح ، ربع معلقة قرنفلة مطحونة ، ربع معلقة ابزار و 3 المعالق من الخل الأبيض ثم نحركو الكل باليد و نوضعو الكاتشوب في قنينات معقمة .

- وقدمات لينا الأخت فاطمة فكرة لتيباس البصلة و الثومة ،  كنقطعوها رقيقة و في كل مرة كنطيبو في الفرن  بعدما كنطفيوه وكيبقى سخون  كنوضعو فيه البصلة أو الثومة ومنين كتولي يابسة كنطحنوها و هكذا كنحصلو على البصلة ميبسة و كذلك الثومة .

وأيضا  قدمات لينا السيدة فاطمة  فكرة لتحضير الموطارد : نصف رابعة من الخردل مخلط اللي لونه غادي للأصفر و اللي اللون ديالو غادي للبني ، معلقة كبيرة من الخرقوم البلدي ، معلقة صغيرة ديال الملح ، ربع كأس ماء ، ربع كأس خل أبيض ، ثومة يابسة ، ابزار حسب الاختيار ، فوق عافية مهيلة نحركو الخليط مدة 15 دقيقة حتى يدفى ثم نخليوه يختار و نوضعوه في قراعي ديال الزجاج يكونو معقمين .

* حكيمة من خنيفرة : مطيشة ديال الحك// القشرة ديال مطيشة بكمية كبيرة نضيفو ليها الملح ، تحميرة ، زيت المائدة وفوق عافية مهيلة نوضعوهم مدة 10 دقائق ثم نطحنوها مزيان و نسموها بالزعتر أو ورقة سيدنا موسى .

* زبيدة من البيضاء : الكاتشوب الطبيعي // 1ضرس ديال الثومة ، 2حبات فلفل أخضر مقطع أطراف صغيرة ، 1 مزيودة ، 1 كأس عصير مطيشة محكوكة بلا قشرة و لا زريعة ، 2 معالق كبار زيت العود ونصف كأس ديال الماء ، ملح ، ابزار ، نصف معلقة من الخل و معلقة كبيرة ديال السنيدة .

في طنجرة نقليو الثومة و الفلفل و نضيفو الكل ماعدا الخل فوق عافية مهيلة حتى يعقد وفاش يبرد نضيفو الخل  ثم نوضعوها في قراعي معقمين .

* أمينة من الصخيرات : مطيشة ديال الحك // قشور ديال مطيشة نحافظو عليها في المبرد و نسلقوها مزيان و نطحنوها ثم نصفيوها و نديروها على النار حتى تعقد ، و نوضعوها في قراعي معقمة .

* فاطمة من البيضاء : صلصة الطماطم للبيتزا و العجائن و كذلك تستعمل في طبخ كويرات السردين  // قشور ديال مطيشة و نضيفو ليها الزعتر قبل مانوضعوها في المبرد . 

نصف كيلو مطيشة محكوكة  وقشور المطيشة ، ملح ، ابزار ، ثومة محكوكة و زعتر ، نوضعو الكل فوق نار مهيلة ثم نضيفو 2 معالق من زيت العود ثم نطحنو الكل فاش يبرد .

ندهنو القرعة بالزيت ثم نسكب فيها الصلصة حتى ماتصوفش ، وممكن الحفاظ عليها لمدة طويلة .

* أمينة من بني ملال : مطيشة الحك // 4 كيلو ديال مطيشة بلا زريعة و لا قشور نديروها في الكوكوط مع 2 معالق كبار من التحميرة و 2معلق ملح ثم نشدو عليها مدة نصف ساعة ثم نطحنوها و نخويوها في قرعة ديال الزجاج و نضيفو ليها الزيت .

شكرا لكل مستمعاتنا لتواصلهم معانا ديما على أصوات و برنامجكم حديث و مغزل مع سناء الزعيم  برنامج كل امرأة مغربية من الاثنين الى الخميس ابتداء من 10 صباحا.

 

 

خدمات اصوات
» حالة الطقس
الأحوال الجوية: المغرب
حفظ المدينة
» أوقات الصلاة
عرض أوقات الصلاة: