كل أخبار ووصفات الطبخ المغربية والعالمية مباشرة و في الحين في موقع أصوات. اسمعوا أصوات مباشرة عبر الانترنت.
الجمعة 9 ديسمبر 2016

حديث و مغزل مع سناء الزعيم

حديث و مغزل مع سناء الزعيم - شهيوات الحريرة و شربات ساخنة

Imprimer
شهيوات الحريرة و شربات ساخنة

اليوم في حديث ومغزل مع سناء الزعيم قدمو لينا المستمعات اللي سمعنا صوتهم لأول مرة مشكوات مجموعة من الشهيوات ديال الحريرة و الشربات الساخنة  وهذه هي الشهيوات :

* زهور من وزان : حريرة وزانية // حمص ، عدس ، قزبر ، معدنوس ، كرافس ، عظام أو طريفات اللحم ، سكينجبير ، ملح ، ابزار و قرفة ، نقليو الكل مع مطيشة ثم نمرقو و نضيفو قطرة زيت ثم زنزيدو الماء و نسدو الكوكوط ، فاش يطيب لينا نضيفو مطيشة الحك و الشعرية والمحمصة ثم ندورورها بالطحين مخلط مزيان ونحركو ، نفقسو بيضة ونطربوها مزيان في زلافة ثم نزيدوها في الكوكوط في الختام نخليوهم يغليو شوية و نقدموها بالصحة و الراحة  .

* أم كاميليا من البيضاء: بركوكش // بصلة متوسطة محكوكة ، حمص مفرك ، طريفات اللحم أو الكديد يكون بايت مرقد في الماء ومقطع طريفات ، أعواد الكرافس ، عود قرفة ، ابزار ، خرقوم ، سكينجبير، زعفران حر ، نقليو الخليط و نمرقوه بالماء و نضيفو معلقة ديال السمن و نزيدو الماء و نسدو الكوكوط ، نضيفو مطيشة صغيرة مسلوقة في شوية الماء و مطحونة و مصفية ، معلقة كبيرة من مطيشة الحك ، تكريضة ديال القزبر و المعدنوس ويكون القزبر أكثر في الكمية ، نغليو الطنجرة وهي محلولة ثم نضيفو بركوكش ونحركو مزيان ونزيدو راس معلقة صغيرة ديال الكروية و شوية القزبر طري و نخليوه فوق عافية مهيلة مدة 5 دقائق و نقدموه بالصحة و الراحة.

* خديجة من زاكورة : شربة الخضر // بصلة محكوكة ، ملح ، ابزار ، سكينجبير ، نقليو الكل ثم نضيفو الماء ، ونزيدو عليها  2كرعات ، 2لفتات ، 3 خيزو ، 3 بطاطا ، 1 فلفلة حمراء حلوة ، مطيشة محكوكة ، 1زلافة ديال الربيع مقطع يكون المعدنوس كميته أكثر ، بعدما تطيب الخضرة ندوروها بشوية الشعرية و الربيع و نضيفو طريفات ديال الدجاج حسب اللي متوفر و نخليو الكل يطيب بالصحة و الراحة .

* فاطمة الزهراء من اسفي : حسوة الشعير // بصلة مقسومة على أربعة ، ملح ، كامون، ابزار ونضيفو الماء حتى يغليو مزيان ثم نضيفو نصف كيلو ديال السميدة ديال الشعير غليظة تكون مغسولة مزيان و مقطرة حتى تطيب مزيان و نضيفو 1 لتر من الحليب و شوية زيت العود .

* مريم من سطات : فتات الشطبة // نصف كيلو مطيشة محكوكة ، بصلة ، ملح ، ابزار ، سكينجبير ، تحميرة ، عرق الخرقوم ، حب رشاد ، العدس و الفول ، شوية المساخن ، الثومة ، القزبر يابس ومطحون  ، الحلبة نقليو الكل و نمرقوهم و نخليوهم يطيبو ثم نضيفو الدقيق ديال الفرص بعدما نكسكسوه و تدوري به الخليط و نخليوهم يطيبو مزيان و نزيدو السمن الحار في الأخير .

* خديجة من مراكش : حريرة بيضاء // بزيزلات الغنمي نغسلوهم و نقشروهم و نرقدوهم في الماء و الخل حتى يتحيد ليهم الرائحة ، نشلظو بصلة و شوية زيت العود و الرومية ثم نشحرو مزيان طريفات اللحم ، نصف كيلو برو ، قبطة ديال الكرافس مكرض ونخليو الكل كيغلي ، من بعد نزيدو 2 بطاطس صحاح في الطنجرة وفاش يطيب الكل نطحنوهم و نقدمو الحريرة بالصحة و الراحة.

- وقدمات لينا الأت خديجة من مراكش فكرة أخرى للحريرة البيضاء بالجلبانة اليابسة غادي نحتاجو نصف رابعة من الجلبانة اليابسة ، نصف رابعة عدس  ونرقدوهم بالليل ، بصلة مشلظة ، ضامة البنة ، كنجمعو الكل في طنجرة حتى يطيبو و نطحنوهم ثم نضيفو ابزار و حك ديال القشدة الطرية و نحركوهم حتى يخثرو و نقدموهم بالصحة و الراحة .

حديث و مغزل مع سناء الزعيم برنامج كل امرأة مغربية من الاثنين الى الخميس ابتداء من 10 صباحا.

 

 

خدمات اصوات
» حالة الطقس
الأحوال الجوية: المغرب
حفظ المدينة
» أوقات الصلاة
عرض أوقات الصلاة: