كل أخبار ووصفات الطبخ المغربية والعالمية مباشرة و في الحين في موقع أصوات. اسمعوا أصوات مباشرة عبر الانترنت.
السبت 3 ديسمبر 2016

حديث ومغزل مع سناء الزعيم

حديث ومغزل مع سناء الزعيم - شهيوات الفقاص بأفكار مختلفة

Imprimer
شهيوات الفقاص بأفكار مختلفة

اليوم في حديث ومغزل مع سناء الزعيم خصصنا هاد الحصة لشهيوات مختلفة لتحضير الفقاص و مستمعاتنا كيف العادة كانو في الموعد وتحفونا بشهيوات مختلفة لتحضير الفقاص و هذه البعض منها:

* دنيا من أحفير : فقاص حلو بالكاوكاو // 4 البيضات ، 4الخمارات حمرين ، 2كيسان سنيدة ، 2كيسان الزيت ، نخلطو الكل ثم نضيفو الدقيق حسب الحاجة حتى تجمع العجين ثم نفصلوها الى كويرات ونورقوها وندهنو الوجه بالمربى و ندردرو الكاوكاو ثم تلوى على شكل كوميرات وندخلوها للفرن حتى تبرد وندهنو بالمربى و ندردرو الكاوكاو مرة أخرى ونقطعوها طريفات صغار.

* مريم من العيون : فقاص حار // 4 الفرماجات ، 4البيضات ، 2خمارات حمرين ، 3 الكيسان و نصف ماء دافئ ، 3الكيسان و نصف ديال زيت المائدة ، 1معلقة زنجلان محمر و مطحون و الدقيق حسب الاختيار و الهريسة كذلك .

نجمعو الكل بالدقيق ونفرقو العجين الى كويرات ثم نحربلوه ، نحضرو قهوة سريعة الذوبان مع الماء و نبداو نتكو هاد الحريبلات بفورشيط ثم ندخلوهم للفرن باش يطيبو نصف طيبة ، ثم نغطيوهم بفوطة فازكة حتى يبردو و نقطعوهم و ندخلوهم مجددا للفرن يكملو الطيبة.

* رشيدة من اسفي: فقاص مالح// 2 فرماجات مربعين ، كأس زيت ، 2 معالق كبار ديال الهريسة و معلقة الموطارد ، 2خمارات ، 2بيضات ، كأس ماء بارد ، ضامة البنة ديال الغنمي ، ضرس ثومة محكوكة، معلقة كبيرة من الربيع مخلط ، 1معلقة كبيرة مطيشة الحك ، ملح ، تحميرة ، دقيق حسب الخليط ، في قصرية نجمعو الكل بالطحين و نجمعوها على شكل حريبلات رقاق و ندخلوهم للفرن يطيبو نصف طيبة ، فاش يبردو نقطعوهم بالمقص على شكل كويرات وندخلوهم للفرن حتى يتحمرو وهاهما واجدين .

* سناء من فاس : فقاص مالح بالبصلة و الهريسة// كأس زبدة مذوبة ، كأس زيت ، كأس معدنوس ، كأس بصلة محكوكة ، 1بيضة ، نصف خمارة ، 2 فرماجات ، ضامة البقري ، نصف معلقة صغيرة من الابزار ، معلقة صغيرة هريسة أو سودانية ، ملح ، الفرص حسب الحاجة .

نجمعو العجين و نلويوها حريبلات و نديروهم في المبرد ثم فاش تطلق العجينة نقطعوها و ندخلوها للفرن حتى تتحمر .

- و قدمات لينا الاخت سناء وصفة ثانية للفقاص الحلو : رابعة الزبدة ، رابعة السكر كلاصي ، رابعة اللوز أخضر مقطع ، 4البيضات ، 1خمارة حمراء ، 2 فانيلا  ، نجمعو الكل على شكل حريبلات ثم نوضعوهم في المبرد و نقطعوهم ثم ندخلوهم للفرن و نطيبوهم في الفرن .

* نادية من الدار البيضاء : فقاص بلدي // 7 البيضات ، 3فانيلا ، 3 خمارات ، 3كيسان زيت ، 3 معالق سنيدة ، معلقة كبيرة من النافع وحبة حلاوة ، حفنة ديال اللوز وكل لوزة مقسومة على أربع قطع ، الدقيق حسب الخليط ثم نعملو كويرات بالعجين و ندهنو الوجه بأصفر بيضة و قهوة سريعة الذوبان ثم نطيبوهم و نقطعوه و نرجعوه يتحمر من جديد في الفرن.

* نعيمة من زاكورة : فقاص بالكاشير و الفرماج والحار // رابعة من الدقيق ، فرماجة واحدة ، 2معالق كبار زبدة ، ملح ، فرماج  أحمر محكوك ونجمعو بالحليب ثم نورقوها ، نحكو الكاشير الحار من فوق العجين و الفرماج ثم نطويو العجين بشكل دائري و نقطعو بالسكين ونلويوه بالسلوفان ونديروه في المجمد ثم نستفوهم في لاطة و ندخلوه للفرن.

 حديث ومغزل مع سناء الزعيم برنامج كل امرأة مغربية من الاثنين الى الخميس ابتداء من 10 صباحا.

 

خدمات اصوات
» حالة الطقس
الأحوال الجوية: المغرب
حفظ المدينة
» أوقات الصلاة
عرض أوقات الصلاة: