طريقة التحضير
*مقادير تتبيلة السمك: سمكة سلمون من وزن 1 كلغ و نصف الى 2 كلغ 2 حامضات مقطعين دوائر (حامض أصفر) القسبور و المعدنوس ، القليل من الشبت ، مكعب بنكهة السمك ، ملح ، إبزارو زيت الزيتون * الطريقة: كنحضرو الماغيناد و نشرملو بيها السمكة ديالنا مزيآن و نوضعو شرائح الحامض داخل السمكة و فوقها و تحتها نفرشو ورق الألومنيوم و نفرشو فوقه ورق الطبخ و نوضعو السمكة و نغلفوها مزيآآن بورق الطبخ و فوقة ورق الألومنيوم و ندخلوها للفرن تطيب المدة الكافية حسب نوع الفرن. * مقادير و طريقة الصلصة : في طنجرة كنوضعو 100غ زبدة و نصف كأس شاي زيت (رومية أو بلدية ) حسب الرغبة و نخليوهم شوية حتى ينساجمو ، نضيف بصلة كبيرة مشلظة رقيق و نشحرها حتى تنزل. نضيفو كمية من دوائر الكلمار حسب الرغبة و نخليوه تنضج. نضيف 2 ضروس الثوم محكوكين ، ثم 500غ من لحم الكروڤيط (أي 1كغ بقشوره...منين كنقيه كيصبح عندي 500غ) ، علبة فطر مقطر من حجم متوسط ، ملح ، إبزار و 2 معالق كبار صلصة الصوجا (لايت) ، القليل من المعدنوس مشلظ و حكة ديال سكنجبير طري ، 250غ قشدة طرية (خفيفة). نترك الكل يغلي و القشدة حتى تنساجم مع العناصر كلها ، نضيف في الأخير علبة جبن أبيض منسم بالأعشاب و نحرك مزيان و نطفي العافية. نحضر صلصة : نصف كأس شاي من الماء نضع فيه معلة كبيرة من النشا (مايزينا) و كنحركها مزيان باش تنسجم مع الماء و نخليهم على جنب...حتى نوصل لمرحلة التقديم ، ثم نضيف هاد الخليط لخليط الصلصة البيضاء و نضع الكل فوق النار و نخليه يعقاد و نزين به واجهة السمكة ديالي و تقدم بالصحة و الراحة. * عناصر التزيين: 1) بروشيط السمك الأبيض على الطريقة الأسيوية: 1كغ من السمك الأبيض حسب الرعبة (إسپادو...فرخ...قرش...) مقطع بروشيط أو مربعات كنوضعوهم في إناء و نضيفو ليهم: 2 معالق كبار صلصة الصوجا الكثيفة القليل من الهريسة ، لب حامضة مصيرة ، القليل من سكنجبير مرقد و اللي متوفر في الأسواق بسعر مناسب و في زجاجة لونها وردي ، القليل من عجين الوازابي (موطارد يابانية) متوفرة لدى المحلات التجارية الكبرى أو لدى المحلات الخاصة ببيع المنتجات الأسيوية ، القليل من صلصة السمك أو نيوك مام، نرقدو مربعات السمك ديالنا في هاد الماغيناد ، ثم كناخدو ورق النوري (ورق أخضر خاص لتحضير السوشي) و متوفر في المحلات التجارية الكبرى و نبدا نقطع أشرطة طويلة منه (بحال الشحمة ديال بولفاف لي كنحضرو في عيد الأضحى) و نبداو نحطو قطعة من السمك داخل الشريط و على الجهة الحرشة و نلفوه و ندخلوه في عود خشبي خاص بالبروشيط (نوضعو 3 قطع في كل عود) و نستمرو حتى نفاذ الكمية...و نبداو ندوزوهم في الدقيق....البيض....الشاپلور (من الأنسب استعمال الشاپلور اليابانية) و نقليوهم في زيت سخونة و نرافقوهم بطبق السمك و بالصحة و الراحة. 2) نام أسيويين باللحوم الثلاثة: المقادير و الطريقة: 250غ كفتة البقري...250غ كفتة الدجاج....250غ كروڤيط منقي....2 معالق كبار العطرية الخاصة بتحضير النام...القليل من الهريسة...حكة ديال سكنجبير طري....ملح...إبزار...5 معالق كبار صلصة الصوجا (لايت)....بيضتان...2 خيزويات محكوكين رقاق...2 ڭرعات (كورجيط) محكوكين....بصلة مشلظة رقيقة ومسقطرة مزيان من الماء....200غ شعرية صينية مرطبة في الماء الساخن و مسقطرة و مقطعة...القليل من صلصة طباسكو...حفنة من الفطر الأسود مرطب في ماء ساخن و مسقطر مزيآن و مقطع رقيق. كنوضعو هاد العناصر كلها في إناء و نجمعوها بالبيضتان و نبداو نشكلو النيم ديالنا بالورقة....حتى نفاذ الكمية...و كنخليوهم يرتاحو شوية...و كنقليوهم في زيت معتدلة الحرارة و نقدموهم سخان و بالصحة و الراحة.
