طريقة التحضير
200غ بيسكوي صابلي مطحون كنضيفو ليه : 125غ زبدة مدوبة ، راس معلقة صغيرة ڭوزة محكوكة (اختيارية)
نخلطو المكونات و نضعوها في مول كيتحل من الجوانب اللي سبق و فرشنا فيه ورق الطبخ....و ندخلوه للثلاجة و نمشيو نحضرو طبقة الجبن.
نطربو 500غ من الجبن الأبيض و من الأفضل نستعملو نوع جيد ، نضيفو ليه 150غ من السكر ، 50غ دقيق و نبداو نضيفو 3 بيضات وحدة بوحدة ، معلقة صغيرة من مستخلص بنكهة الڤانيلا أو نكهة البرتقال أو قشرة حامضة محكوكة ، و في الأخير نضيفو 250مل من القشدة الطرية.
نصبو الخليط فوق طبقة البيسكوي و ندخلوه للفرن مسخن على 180° مدة 50 حتى 55 دقيقة.
نطفيو عليه بدون ما نفتحو الفرن....و نخليوه داخل الفرن حتى يبرد الفرن....نخرجوه و نوضعوه في الثلاجة ليلة كاملة ...و في اليوم التالي و عند التقديم عاد نحيدوه من المول ونقدموه بعد ما نزينوه حسب الرغبة و بالصحة و الراحة.
** وصفة التشيزكيك بأوريو من عند الشاف زينة سلوان
مقادير و طريقة قاعدة البيسكوي:
* القاعدة :
200غ بيسكوي من نوع أوريو مطحون كنضيفو ليه 125غ زبدة مذابة ، نخلطو الكل مزيان و نوضعوهم في قاعدة المول لي كيتفتح من الجوانب و لي غنكونو فرشنا فيه ورق الطبخ من قبل....ندخلوه للثلاجة مدة 15د تقريبا .
* خليط الجبن :
في وعاء يكون بارد من الأفضل ، نخفقو 400غ من القشدة الطرية "نوع جيد" للحصول على شانتيي...و نحتفظو بها في الثلاجة..
ناخدو 12 قطعة بيسكوي أوريو...كنحيدو داك الكريما لي كتكون بين القطعتين نحتفظو بها...ونهرمشو البيسكوي و نخليوه على جنب...و في بول و بالطراب الكهربائي كنطربو علبة حليب مركز محلى "نيستلي" مع 2 علب جبن أبيض نوع جيد، 4 ياغورت كريمي "پيرلي" بالسكر مع الكريما اللي حيدنا من البيسكوي....و 3 أوراق من الجيلاتين مرطبين من قبل في ماء بارد و معصرين و مذوبين في 2 معالق كبار عصير الحامض ساخن ، كنضيفو الشانتيي و البيسكوي مهرمش غير بملعقة خشبية و بشوية و كنوضعو الخليط فوق طبقة البيسكوي وندخلو الكل للمجمد ليلة كاملة...و في اليوم التالي نحيدوه من المول غير بشوية...نوضعوه في صحن التقديم و نزينوه بحبات أوريو من الحجم الصغير و نرشو الكاكاو أو حسب الرغبة و بالصحة و الراحة
